Ліна Кастэнка
ЦАРЫЦА САВЫ
Царыца Савы
плакала ўначы.
А ўранні
абудзілася пры славе,
у дыяментах,
золаце, парчы.
І да яе ганцоў
цары ўсе слалі.
Яна іх брала зграбнасцю ў палон.
Ніхто пры ёй
разумным не здаваўся.
І нават сам
прамудры Саламон
да скону веку ёю
захапляўся.
Красуня, казка, магараджаў чар.
Віно вачэй, што
не дае спакою.
Цуд-ружа у садах
любоўных мар.
Маўчанне фаліянта
трапяткое.
Гарачы сон. Нясталы Арыент.
Такі ў царыцы
вобраз быў цікавы.
Жамчужына ў
жуковіне легенд, —
царыца Савы, о,
царыца Савы.
У дыяментах, золаце, парчы.
Вакол яе ахоўцаў
незлічона.
Царыца Савы
плакала ўначы.
Але няма пра тое
ў Саламона.
© Дзмітро Шчарбіна, беларускі пераклад, 2014.